Muqdisho (soomaalinews.com) – Madaxweynaha dowladda federaalka ah ee Soomaaliya, Mudane Xasan Sheekh Maxamuud ayaa wadahadal khadka taleefoonka ah la yeeshay madaxweynayaasha dalalka Turkey, Jabuuti iyo Qatar.

Wadahadalkan ayaa qaatay saddex saacadood, wuxuuna si gaar gaar ah u dhexmaray madaxweyne Xasan Sheekh,  Rajab Dayib Ordogan, Ismaaciil Cumar Geelle iyo Amiir Tamiim Binu Xamad.

Ugu horreyn madaxweynaha Soomaaliya ayaa madaxdan ka guddoomay hambalyo ku aaddan Ciidda barakaysan ee Carafa, oo ay usoo direen dowladda federaalka iyo shacabka Soomaaliyeed.

Sidoo kale waxa ay muujiyeen taageerada ay u hayaan dowladnimada iyo midnimada shacabka Soomaaliyeed, oo haatan la daala dhacaya dhibaatooyin gudaha ah.

Madaxweynaha ayaa dhankiisa u rajeeyey shacabka Soomaaliyeed horumar iyo sannado barwaaqo ah, wuxuuna uga mahadceliyay saddexda hoggaamiye garab istaaga ay u muujiyeen Soomaaliya.

Waxaa kale oo uu intaasi ku daray dadaalka ay dowladdu gelinayso kobcinta xiriirka ay la leedahay dalalka Turkiga, Qatar iyo Jabuuti, kuwaas oo soo garab istaagay xilliyada adkaa.

Wadahadalkan ayaa kusoo aadayo, ayada maalintii labaad loo dabaal-dagayo, munaasabadda Ciida Carafo oo ah maalmo ku weyn quluubta ummadaha Muslimiinta.

Si kastaba, dowladaha Turke, Jabuuti iyo Qatar ayaa kamid ah waddamada xiriirka wanaagsan la leh Soomaaliya, sidoo kalena qayb ka ah dagaalka ka dhanka ah kooxda Al-Shabaab.





Source link