Muqdisho (soomaalinews.com) – Ciidamada Soomaaliyeed ee dhowaan lagu soo tababaray gudaha dalka Eritrea ayaa haatan wajahaya xaalad adag, taas oo ka dhalatay mushaar la’aan haysata, tan iyo markii dib loogu soo celiyay dalka, sida uu shaaca ka qaaday Xildhibaan Khaliif Cabdi Cumar oo ka tirsan Golaha Shacabka Soomaaliya.
Xildhibaanka oo ka hor hadlayay baarlamaanka ayaa sheegay in ciidamada lagu soo tababaray Eritrea oo qaarkood la keenay aysan weli helin wax xuquuq ah, ah, isla-markaana aysan tabar u heyn dowladdii tababaray iyo sidoo kale dowladda Soomaaliya.
“Waxaan ognahay 4 sanno ciidan ayaa waxay ku maqan yihiin Eritrea qaar waa ka yimaadeen, qaarna way ku maqan yihiin waxaan xogteeda haynaa inayna heysan one Dollar oo dowladdii Eritrea xamuulkaas qaadi karin oo tabarteeda laheyn, ” ayuu yiri.
Sidoo kale wuxuu tilmaamay in la dayacay ciidamadaasi, isla-markaana loo baahan yahay in dowladdu ay qaado tallaabo deg-deg ah oo looga jawaabayo arrintaasi.
Waxaa kale oo uu xusay in sidoo kale ay dhibaateysan yihiin ciidamada Soomaaliyeed ee weli ku maqan waddanka Eritrea, ayna yihiin maxaabiis, sida uu hadalka u dhigay.
“Kuwii hore lama xallin, kuwii jiray Eritrea warkooda daa oo hadda waa maxaabiis, meelaha ayay ka bax baxsadaan, runtii waxaan aad u adkeynayaa wasiir inaad ciidanka aad haysato horta meel aad saarto oo aad xaqiijiso” ayuu mar kale yiri xildhibaan Khaliif Cabdi Cumar.
Xildhibaan Khaliif Cabdi Cumar oo hadalkiisa ayaa sidoo kale intaasi kusii daray “Ciidankaas waa dayacan yihiin nidaamka askarta waxaa waayay askariga inta uu tababarka ku jiro saabuun ayuu helaa, cunto ayuu helaa, daryeel iyo daawo ayuu helaa, wixii ka dambeeya haddii tababarkiisa soo dhammeysto mushaarkiisaa horay loo bilaabaa”.
Ciidamadan oo ka tirsan Xoogga dalka Soomaaliyeed ayaa markii la keenay ku soo aaday xaalad dagaal, waxaana qaarkood la geeyay furinta hore ee dagaalka Al-Shabaab, halkaas oo ay sidoo kale kasoo gaartay dhimasho iyo dhaawac, gaar ahaan dagaalkii Masagawaa.
Dowladda Soomaaliya ayaan weli ka hadlin arrintan, balse waxaa hadalka xildhibaanka goobjoog ahaa wasiirka Gaashaandhiga, Cabdulqaadir Maxamuud Nuur (Jaamac) oo uu toos ugu gudbiyay kiiskan, kadib markii uu shalay hortega xubnaha Golaha Shacabka.