Suuqa kala iibsiga ayaa meel xiiso leh maraya iyada oo ay durba dheceen saxiixyo lama filaan ah iyo kuwo waaweyn.
Messi ayaa aaday maraykanka, Benzema ayaa aaday sucuudiga, Mount ayaa ku biiray Man Uniyed, Kovacic ayaa noqday xiddig Man City ah.
Laakiin waxa shaki la’aan ah in ay lama filaano badan dhici doonaan inta uu furanyahay suuqa kala iibsiga xagaaga.
Hadaba warbixintan waxa aan ku soo bandhigi doonaa saxiixyada dhici kara ka hor inta uuna bilaaban xilli ciyaareedku.
1.Mbappe -> Real Madrid:
Mbappe ayaa diiday in uu heshiis cusub u saxiixo PSG, taas ayaa dhigaysa boos adag kooxda reer France waxana ay go’aansan karaan in ay iska iibiyaan xiddiga ama ay xor ku waayaan xagaaga dambe.
Sidaas darteed marka la eego qiimaha ay ka soo bixiyeen waxa laga yaabaa in ay iska iibiso xiddiga ka hor inta uuna dhamaan suuqa kala iibsiga xagaaga, Real Madrid ayaana ah kooxda sida weyn loo filayo in ay la saxiixato.
2.Harry Kane -> Bayern Munich:
Bayern Munich ayaa ilaa haatan isku dayday saxiixa Kane waxana laga diiday laba dalab laakiin wali kamay quusan saxiixa xiddiga.
Tababaraha Bayern ee Tuchel ayaa xitaa xiddiga si shaqsi ah ula hadlay si uu ugu qanciyo in uu ku biiro kooxda reer Germany suuqa xagaagan.
3.Andre Onana -> Man United:
Kooxda Man United ayaa si aad ah ugu baahan Goolhaye waxana ay bartilmaameedkooda 1-aad ka dhigteen Onana kaas oo ay ilaa haatan 2 dalab ka gubiyeen.
Inter ayaa isku adkaynsa Man United si ay uga helaan lacag fiican laakiin United ayaa si weyn ugu kalsoon in ay Onana ka dhigi doonto saxiixeedii 2-aad ee suuqa xagaaga.
4.Frenkie De Jong -> Man City:
Man City ayaa lumisay Gundogan waxana haatan laga yaabaa in ay Lumiso Bernardo Silva kaas oo lala xidhiidhinayo horyaalka sucuudiga.
Kooxda Pep Guardiola ayaa De Jong u calaamdsatay bartilmaameedkooda 1-aad Barcelona ayaana diyaar u ah in ay iska iibiso xiddiga hadii ay dalab fiican hesho.
5.Neymar -> Barcelona:
Kooxda Barcelona ayaa xagaagan si weyn u doonaysay in ay dib u so ceshato Lionel Messi laakiin xiddiga reer Argentine ayaa iska indha-tiray kuna biiray koox kale.
Laakiin Barcelona ayaa markan diirada u jeedin doonta xiddig kale oo u soo ciyaaray iyada oo doonaysa Neymar kaas oo ay PSG diyaar u tahay in ay iska fasaxdo.
6.Achraf Hakimi -> Man City:
Guardiola ayaa doonaya in uu iska diro Cancelo kaas oo aan mustaqbal ku lahayn kooxda ku guulaystay saddexda koob xilli ciyaareedkii dhamaaday.
Man City ayaa sidaas darteed dareenkooda u jeedin doonta xiddiga reer Morocco ee Hakimi si ay ugu xoojiso daafaceeda xilli ciyaareedka dambe.
7.Aymeric Laporta -> Arsenal:
Mikel Arteta oo suuq ka furtay Man City sanadihii ugu dambeeyay ayaa donaya in uu kooxda mar kale ka soo qaato xiddig kale waxana uu markan ka doonayaa xiddiga Aymeric Laporta.
Arsenal ayaa ka fiirsanaysa in ay u dhaqaaqdo daafaca reer Spain iyaga oo ka faa’iidaysanaya xidhiidhka fiican ee ay labada kooxood leeyihiin.
Sii Akhriso: Garaad Jaamac: Dawlada Somaliya Ayaa Dagaalka Lasacaanood Ku Taageersan Somaliland.
Related