Muqdisho (soomaalinews.com) – Ra’iisul wasaaraha xukuumadda Soomaaliya, Mudane Xamza Cabdi Barre ayaa maanta guddoomiyay shir todobaadlaha ee golaha wasiirada, kaas oo looga hadlay arrimo xasaasi ah oo ay kamid yihiin amniga iyo dagaalka Shabaab.
Ugu horreyn xubnaha golaha wasiirada ayaa shirkooda ku ansixiyey Hindise Sharciyeedka Xuquuqda Carruurta Soomaaliyeed oo la horgeeyay, kadib dood ay ka yeesheen
Waxaa Hindise Sharciyeedkan soo diyaarisay Wasaaradda Haweenka iyo Xuquuqul Insaanka, ee ay hoggaamiso Khadiija Diiriye wuxuuna ilaalinayaa xuquuqda caruurta.
Sidoo kale wuxuu meeshana ka saarayaa wax walba oo ku xad-gudbaya xuquuqdooda, sida ay shaaca ka qaaday wasaaradda soo gudbisay ee Haweenka iyo Xuquuqul Insaanka.
Intaas kadib golaha ayaa shirkooda uga hadlay xaaladaha amni ee dalka iyo dagaalka ka dhanka ah kooxda Al-Shabaab ee haatan ka socda koonfurta iyo bartamaha Soomaaliya.
Golaha ayaa warbixin la xiriirta amniga dalka iyo wajiga labaad ee howlgalllada socda ka dhageystay Wasaaradaha Amniga Gudaha iyo Gaashaandhigga oo ka hadlay goobta.
Xubnaha golaha wasiirada ayaa sidoo kale bogaadiyey billowga wajiga labaad ee howlgalkan oo qorshuhu yahay in lagu xoreeyo goobaha ay Shabaab kaga sugan yihiin deegaanada Galmudug iyo Hirshabelle, si loogu gudbo meelaha kale ee ay ku harsan yihiin.
Ugu dambeyn golaha ayaa waxaa la horkeeyay warbixinno kale oo la xiriira Guddiga Qiimaynta Amniga Xarumaha Dowladda, Qorshaha Dardar-gelinta Dakhliga Gudaha iyo Hannaanka mideynta kormeerka & Qiimaynta Qaran ee Qorshaha Horumarinta Qaranka ee 9aad iyo Ilaalinta deegaanka oo ay soo bandhigeen Wasaaradaha Maaliyadda, Qorsheynta, Amniga Gudaha iyo Deegaanka iyo Isbeddelka Cimillada
Soomaaliya ayaa waxaa haatan ka socda guluf dagaal oo ka dhan ah Al-Shabaab, kaas oo uu hoggaaminayo madaxweyne Xasan Sheekh oo hadda ku sugan caasimada Galmudug.
