Dhuusamareeb (soomaalinews.com) – Fal-celin kala duwan ayaa ka dhalatay khilaafka siyaasadeed ee ka dhex qarxay qaar kamid ah madaxda sare ee dowlad-goboleedka Galmudug.
Qoraallo ay soo kala saareen Madaxweynaha iyo ku-xigeenkiisa Galmudug ayaa muujinaya in aad loo kala fogyahay, kaasi oo banaanka soo dhigay khilaaf huursan oo u dhaxeeyay labada masuul.
Madaxweyne ku-xigeenka Galmudug Cali Daahir Ciid ayaa soo saaray qoraal uu shaqada kaga joojinayo wasiirka arrimaha gudaha oo uu ku eedeeyay in uu xagal-daaciyay dagaalkii lagula jiray Alshabaab.
Daqiiqado kooban kadibna waxa soo baxay qoraal uu Madaxweynaha Galmudug Axmed Cabdi Kaariye Qoor-Qoor uu ku beeninayo qaraarka madaxweyne ku-xigeenka.
Madaxweyne Qoor-Qoor ayaa sharci-darro ku tilmaamay shaqo-joojinta ku-xigeenkiisu ku sameeyay wasiirkiisa arrimaha gudaha, oo la sheegay inay aad iskugu dhow yihiin.
Sidoo kale Qoor-Qoor ayaa qoraalkaan ku diiday xil ka qaadis golaha deegaanka degmada Caabudwaaq ay todobaadkii hore ku sameeyeen guddoomiyihii degmadaas, taasi oo cirka kusii shareertay khilaafka labada nin.
Haddaba sidee looga fal-celiyay arrinkaan?
Ridwaan Xaaji: “Qof Farmaajo xisbigiisa kamid ahaa oo aan rabshad wadin waa la waayay.”
“Madaxwenaha iyo madaxwene ku-xigeenku iyo wasiiradu wixii kala aragti duwanaana si hoose uma xaliyaanoo,” ayuu yiri Ibraahim Khaliif.
Saciid Cali: “Madaxwayne ku-xigeenka tallaabada uu qaaday waxay u egtahay Caabudwaaq anaa kaso jeeda wasiirkana anagaa isku reera waana wax aan sax ahayn.”
Cabdinur Ismaciil Cali ayaa sidoo kale waxa uu yiri “Galmudug sanadihii dambe way caafimaad qabtaye ha laga ilaaliyo khilaafka, khilaafku waa cudurka ragaadiya horumarka dowlad iyo dadkeedaba.”
“Waa aduun wareeray anaga midba waraaq yuusan noo soo saarine dhamaantiinba badal baa tihiin idinma rabnee,” ayey tiri Cuddoon Axmed Mataan.
Bashiir Daahir: “Mudane Qoor-Qoor tallaabo fiican maha ficilkaan ee dib iskugu laabta.”
Duraan Cali Xasan ayuu yiri: “Isagaa laga rabaa madaxweynuhu in uu isku wado maamulkiisa.”
“Xiligaan kuma haboon warqadahaan is daba yaacaya ee dib isugu laabta oo halganka ha fashilinina,” ayuu yiri Axmed Maxamed Axmed.
Cabdulqaadir Baariyow: “Xasiloonidii siyaasadeed ee aan ku faanaynay haddaa nahay reer Galmudug inaad sidaan ka dhigtaan ceeb iyo foolxumo ayey idin ku tahay.”
Cabdulqaadir Muuse ayaa sidoo kale yiri “Fowdo la rabo in dagaalka lagu fashiliyo laakiin ogow in waqtigaada dhamaaday oo doorasho la qabanayo.”
“Filim bay rabaan in ay noo shidan si ay dagaalka Al-Shabaab nooga mashquuliyaan waan idin fahmayna raali ahaada,” ayuu yiri Cusmaan Saciid Shire.
Yaxye Cadi Xasan: “Lama joogo xiligii Madaxda galmudug ay ku mashquuli lahayd is qab-qabsi iyaga dhexdooda ah ee wadada dagalka uwada jeesta xili wax kale lugu mashquulo ma joogte.”