Muqdisho (soomaalinews.com) – Xildhibaanada Golaha Shacabka ee Baarlamaanka Soomaaliya ayaa cod aqlabiyad leh ku diiday in la bilaabo su’aalo weydiinta xubnaha golaha wasiirada ee xukuumadda federaalka ah.

Warqad kasoo baxday xafiiska ra’iisul wasaaraha ayaa lagu jadwaleeyay hanaanka shaqo ee golaha ee saddexda billood ee soo aadan, taas oo xukuumadda ay rabtay in wasiirradeeda asbuuc walba labo loogu yeero.

Wasiirka Amniga ee dowladda federaalka ayaa Sabtidii tegay Golaha Shacabka si su’aalo loo weydiiyo, laakiin waxaa loogu jawaabay anagu kuma yeeran.

Jadwalka la xisaabtanka xukuumadda waxaa soo sameeyay xafiiska ra’iisul wasaaraha, laakiin buuq iyo diidmo ayuu la kulmay. Jadwalkaas waxay Xildhibaannada ku sheegeen mid lagu gafay micnaha Golaha Shacabka, buuq kuma dhamaan diidmada ee cod ayaa looga adkaaday intii rabtay in wasiirka su’aalo la weydiiyo.

Dhowr farriimood oo aan la sahashan karin oo ku wajahan ra’iisul wasaare Xamza ayuu xambarsanaa go’aankii diidmada ahaa ee shalay ka yimid Golaha Shacabka. 

Farriinta koowaad: Waa in Golaha Shacabka uu ka fog yahay dhanka ra’iisul wasaaraha. Golaha Shacabka waa midka ansixiya ra’iisul wasaaraha, sidoo kalena awoodda u leh inuu shaqada ka eryo.

Ra’iisul Wasaaraha waxa uu maanta fahmay in uusan koox difaaci karta ku haysan golaha dhexdiisa, waana farriin walaac ah oo uga baahan inuu deg deg uga howl-galo.

Adiga oo ra’iisul wasaare ah in aad Golaha Shacabka kala fog tihiin ma ahan arrin fudud.

Midda labaad waa in laga sugaayo isku shaandheyn: Dhowr jeer waxaa la sheegay inuu ra’iisul wasaaraha damacsan yahay inuu beddelo qaar kamid ah xubnaha Golaha Wasiiradda ee loo jeedo inay shaqada wadi la’yihiin.

Waxaa jirra Xildhibaano banaanka taagan oo sugaya isbeddelkaas, qaarkood ayaa shalay laga arkayay kaamirada, waxaana lagu fasiray buuqooda isbeddelkii aaway?.

Midda saddexaad waa inay Golaha Shacabka wax walba ka suurtoobaan: Markii laga cabir qaato dhaqankii shalay, wax walba oo xukuumadda cimrigeeda soo gaabin kara ayaa laga filan karaa Golaha Shacabka.

Guddoonka waxaa ka muuqatay in aanay waxba gacanta ugu jirin, oo aanay xitaa xukuumadda isku haleyn inay difaacan. Barqo cad in xukuumadda sharciyadeeda shaki la galin karo ayuu sii carabaabaya dhaqankii shalay ee Golaha Shacabka.

Haddaba, Maxaa la gudboon ra’iisul wasaare Xamza?

Ra’iisul Wasaaraha intaan ka badan kama dhuuman karo waaqica. Sidii lagu yaqaanay ra’iisul wasaarayaashii hore, Xamza waa in gacanta ku dhigaa faylka Baarlamaanka, Xildhibaanada toos ula macaamiil, xukuumaddiisa saaxiibo u sameeya oo uu dhinaca kale xal u raadiya caajiska ka muuqda xukuumadda, inta uusan Baarlamaanka toos usoo beegsan kursigiisa.





Source link